عومەر عەلى غەفور
یەكێك لە جیاكەرەوەكانى ساڵى 2010 ئەوەیە لەم ساڵەدا ژمارەیەكى بێپێشنە لە سكاڵا بەهۆى بابەتە رۆژنامەوانیەكانەوە لە دادگەكانى هەرێمى كوردستان لەدژى بەرپرسانى هەندێ لە كەناڵە میدیاییەكان تۆمار كراون، لە هەندێكیاندا لایەنى سكاڵاكار داواى قەرەبووى مادیى گەورەى كردووە، كە هەندێكیان گەیشتوونەتە ملیارێك دۆلار.
سكاڵاكان زۆربەیان لەلایەن حزب و لایەن و دەزگا و كەسایەتییەكانەوە تۆمار كراون، لە ژمارەیەك لە فایلەكاندا دادگە لە دژى رۆژنامەنووسان بڕیارى وەرگرتووە و سزاى داون. ئەوە بوو كۆمەڵى ئیسلامیى كوردستان لە چەند مانگى رابردوودا سكاڵایەكى لەدژى گۆڤارى "گوڵان" تۆمار كرد و لە ئابى رابردوودا، دادگە سەرنووسەرى گۆڤارەكەى بە 5 ملیۆن دینار دینار غەرامە كرد.
لە 12 كانوونى یەكەمدا دادگەى بەرایى چوارى هەولێر لەسەر سكاڵایەكى فازل میرانى سكرتێرى مەكتەبی سیاسیی پارتى دیموكراتى كوردستان، بە تۆمەتى ناوزڕاندن، سزاى 35 ملیۆن دینارى بەسەر سۆران عومەر سەرنووسەرى گۆڤارى "رێگامەگەزین"دا سەپاند. هەروەها لەم رۆژانەدا لەسەر سكاڵایەكى وەزیرى كشتوكاڵى هەرێم دادگەى كەتنى هەولێر بڕى 6 ملیۆن دینار غەرامەى بەسەر سەرنووسەرى رۆژنامەى "ستاندەرد"دا سەپاند.
لە مانگى نیساندا بەتۆمەتى سووكایەتیكردن بەپیرۆزییە ئاینییەكان، مەلا بەشیر حەداد وەك سەرۆكى لێژنەى ئەوقاف لە پەرلەمانى كوردستان، لە دادگە سكاڵایەكى یاسایى لەدژى فەرهاد پیرباڵ سەرنووسەرى گۆڤارى "وێران" تۆمار كرد و لە 20ى كانوونى یەكەمدا دادگە بڕیارى دا پیرباڵ بە 6 مانگ زیندانى حوكم بدا (لەگەڵ جێبەجێنەكردنى ئەم سزایە) لەگەڵ غەرامەكردنى بە بڕی 5 ملیۆن دینار.
سكاڵاكانى پارتى
لە ماوەى مانگى ئابدا بەتۆمەتى زیانگەیاندن بە ناوبانگى حزبەكەى لەرێى بڵاوكردنەوەى چەند بابەتێكەوە، فازڵ میرانى سكرتێرى مەكتەبی سیاسیى پارتى لەرێى پارێزەرەكەیەوە ژمارەیەك سكاڵاى یاسایى لە دادگەى هەولێر لەسەر رۆژنامەكانى "رۆژنامە"، "هاوڵاتى"، "ئاوێنە" و گۆڤارى "لڤین" تۆمار كرد و داواى قەرەبووكردنەوەى ئەو زیانە مەعنەویەى كرد، بەم شێوەیە:
دوو سكاڵاى لەسەر رۆژنامەى "رۆژنامە" تۆمار كرد، بۆ یەكەمیان داواى بڕى یەك ملیار دینار و بۆ دووەمیان داواى بڕى 500 ملیۆن دینارى عێراقى قەرەبووى كرد.
سكاڵایەكى لەسەر رۆژنامەى (هاوڵاتى) تۆمار كرد و داواى 500 ملیۆن دینار قەرەبووى كرد.
سكاڵایەكى لەسەر رۆژنامەى (ئاوێنە) تۆمار كرد و داواى 500 ملیۆن دینار قەرەبووى كرد.
دوو سكاڵاى لەسەر گۆڤارى (لڤین) تۆمار كرد، كە بۆ هەردووكیان داواى یەك ملیار دینار قەرەبووى كرد.
هەروەها میرانى سكاڵاى لەسەر هەریەك لە رێبین هەردى، عەدنان عوسمان و كامەران مەنتك تۆمار كرد.
سكاڵاكانى یەكێتى
هەر لە هەمان مانگدا كۆسرەت رەسوڵ عەلى جێگری سكرتێری گشتیی یەكێتیی نیشتمانی كوردستان، بەتۆمەتى ناوزڕاندنىلە هەواڵێكدا، لەڕێگەی سكرتێری رۆژنامەوانیی خۆیەوە داوایەكی یاسایی لەسەر رۆژنامەی "دەستوور" و كۆمپانیای نالیا تۆمار كرد.
سكاڵاكانى حزبە ئیسلامیەكان و دامەزراوە ئاینیەكان
لە سەرەتاكانى ئەمساڵدا كۆمەڵى ئیسلامى سكاڵایەكى لەدى گۆڤارى گوڵان تۆماركرد، كە لەلایەن مەكتەبی ناوەندى راگەیاننى پارتى دیموكراتەوە دەردەچێ.
لە مانگى نیساندا بەتۆمەتى سووكایەتیكردن بەپیرۆزییە ئاینییەكان، سەرۆكى لێژنەى ئەوقاف لە پەرلەمانى كوردستان، لە دادگە سكاڵایەكى یاسایى لەدژى سەرنووسەرى گۆڤارى "وێران" تۆمار كرد.
لە مانگى تەمووزدا بەتۆمەتى بڵاوكردنەوەى زیانیاریى هەڵە لەبارەى ئەو حزبەوە، یەكگرتووى ئیسلامیى كوردستان دوو سكاڵاى یاسایى لەسەر گۆڤارى "سڤیل" تۆمار كرد.
مەلا ئەنوەر خۆشناو، زاناى ئاینیى یەكگرتوو بەتۆمەتى ناوزڕاندنى لە هەواڵێكى ڕۆژنامەكەدا، سكاڵایەكى لەسەر ڕۆژنامەى "ڕووبەر" تۆمار كرد و دادگەى كەتنى هەولێر، مانگى رابردوو، بڕیاری دا بە غەرامەكردنى سەرنووسەرى رۆژنامەكە بە بڕى 2 ملیۆن دینار.
لە مانگى تشرینى دووەمدا كەناڵى ئاسمانیى "سپێدە"ى یەكگرتووى ئیسلامی، بەهۆى بەكارهێنانى لۆگۆى كەناڵەكە لە كلیپێكى گۆرانیبێژ (لۆكە زاهیر)دا، سكاڵایەكى لەسەر ناوبراو تۆمار كرد و داواى یەك ملیار دینار قەرەبووى كرد، دواتر زاهیر داواى لێبوردنى كرد و كەناڵى ناوبراویش سكاڵاكەى كێشایەوە.
لە 24ى هەمان مانگیشدا پارێزەرى سەڵاحەدین محەمەد ئەمیندارى گشتیى یەكگرتوو، لە دادگەى بەرایی هەولێر بە تۆمەتى "ناوزڕاندن و بڵاوكردنەوەى بەڵگەنامەى ساختە" سكاڵایەكى لەدژى (بەرهەم عەلى) سەرنووسەرى رۆژنامەى (باس) تۆمار كرد و داواى دوو ملیار دینار قەرەبووى كرد، ئەویش دواى بڵاوكردنەوەى نامەیەك، كە بەگوتەى رۆژنامەكە، بەهائەدین بۆ سەرۆكى حزبی ئیسلامیى عێراقى ناردوووە و تێیدا داواى هاوكاریى مادى لێدەكات و رەخنە لە دەسەڵاتدارانى هەرێم دەگرێ لە ژمارە (20)ى رۆژنامەكەدا، كە بەگوتەى پارێزەرەى ئەمیندارى یەكگرتوو، ئەو نامەیە ساختەیە.
سكاڵاى لایەنە رەسمیەكان
وەزیرى كشتوكاڵى هەرێم لە دادگەى كەتنى هەولێر سكاڵایەكى لە دژى سەرنووسەرى رۆژنامەى "ستاندار" تۆمار كرد و لەم رۆژانەدا دادگە بڕى 6 ملیۆن دینار غەرامەى بەسەر سەرنووسەرى رۆژنامەكەدا سەپاند. هەروەها دوو سەرۆك شارەوانیى هەرێم بەتۆمەتى ناوزڕاندن و بڵاوكردنەوەى زانیاریى ناڕاست لەبارەیانەوە، سكاڵایان لەسەر سەرنووسەری گۆڤارى "هەفتانە" و ئامادەكارى ڕاپۆرتەكە تۆمار كرد.
سكاڵاكانى رۆژنامەنووسان
ئەحمەد میرە سەرنووسەری گۆڤاری "لڤین" لە 8ى ئابدا بەتۆمەتی هاندان بۆ تیرۆركردنی رۆژنامەنووسانی گۆڤارەكە، لە بنكەی پۆلیسی سەرا لە سلێمانی، سكاڵایەكی لەسەر مەسعوود بارزانی سەرۆكی پارتی دیموكراتی كوردستان تۆمار كرد.
هەر لەو سەوروبەندەدا سەرنووسەرى پێشووى رۆژنامەى "هاوڵاتى" بەتۆمەتى ساختەكردنى مۆر و بەڵگەنامەى ئەو رۆژنامەیە لە دادگەیەكى سلێمانى سكاڵاى لەسەر جەمال عەبدوڵا سەرنووسەرى گۆڤارى "بەڵگە" تۆمار كرد.
داواى لێبوردنكردنى میدیاكان
لە مانگى شوباتدا گۆڤارى (خەڵك)، كە سەردەشت حەمە ساڵح، سەرنووسەرى ماڵپەڕى چاودێرى نزیك لە مەلا بەختیارى ئەندامى مەكتەبی سیاسیی یەكێتی سەرنووسەر و خاوەن ئیمتیازى بوو، بەشێك لە كتێبی (ئایەتە شەیتانییەكان)ى سەلمان روشدى بە كوردى بڵاو كردەوە، ئەوەیش ناڕەزایى توندى ئێران و ناوەندى ئیسلامیى كوردستانى لێ كەوتەوە.
لە ئەنجامدا مەكتەبى ناوەندى راگەیاندنى یەكێتى لە روونكردنەوەیەكدا لە 28 شوباتدا رایگەیاند ئەو گۆڤارە هیچ پەیوەندییەكى بەو حزبەوە نیە، دواتریش لە 1ى ئاداردا سەرنووسەرى "خەڵك" لە روونكردنەوەیەكدا رایگەیاند بڵاوكردنەوەى ئەو بابەتە هەڵەیەك بووە بەسەریاندا تێپەڕیوە و داواى لێبوردنى لە خوێنەران كرد.
لە 23ى كانوونى یەكەمیشدا عارف قوربانى سەرنووسەرى رۆژنامەى (ئاسۆ) نێزیك لە بەرهەم ساڵحى سەرۆكى حكوومەتى هەرێم، داواى لێبوردنى كرد لە بڵاوكردنەوەى شیعرێكى (حەمە كاكەرەش) لە پاشكۆى ئەدەبى رۆژنامەكەدا لە رۆژى پێشتردا، كە وەزارەتى ئەوقاف و یەكێتیى زانایان شیعرەكەیان بە سووكایەتیكردن بە بەها ئاینیەكان لەقەڵەم دابوو.
بەپێى مادەى دووەمى یاساى رۆژنامەگەریى كوردستان كە لە 22 ئەیلوولى 2008دا لە پەرلەمانى كوردستان پەسند كرا، "رۆژنامەگەرى ئازادە و هیچ سانسۆرى لەسەر نییە، ئازادیى دەربڕین و بڵاوكردنەوە بۆ هەموو هاوڵاتیان دەستەبەرە لەچوارچێوەى رێزگرتنى ئازادى و تایبەتییەكانى تاكەكان و تایبەتمەندیى ژیانیان".
هەروەها بەپێى هەمان مادە "رۆژنامە قەدەغە ناكرێ و دەستى بەسەردا ناگیرێ".
بەپێى مادەى نۆیەمیش رۆژنامە بە بڕى یەك تا 5 ملیۆن دینار غەرامە دەكرێ ئەگەر چەند پێشێلكارییەكى كرد، لەوانە سووكایەتیكردن بەبیروباوەڕ و رێورەسمە ئاینییەكان، ناوزڕاندن، چاندنى رق و كینە لە نێو ریزەكانى كۆمەڵدا، جنێودان یاخۆ بڵاوكردنەوەى نهێنییەكانى ژیانى تایبەتى.
28-12-2010
ليست هناك تعليقات:
إرسال تعليق